Write a comment
Cúlra an Chumainn
Is iomaí rud a thiteann amach i saol na Gaeilge le linn mhí na Féile Pádraig. Ar cheann de na himeachtaí is mó tairbhe agus is mó sult ná Féile na Scoildrámaíochta, agus tá cúpla imeacht galánta ar na bacáin d’aisteoirí óga an cheantair. Eagraíonn An Cumann Scoildrámaíochta, atá faoi phátrúnacht an Aire Gnóthaí Pobail, Tuaithe agus Gaeltachta, féilte drámaíochta le drámaí trí Ghaeilge a chur chun cinn ar fud na tíre. Scoláirí bunscoile agus iarbhunscoile a ghlacann páirt sna féilte seo. Is cúis bróid don chumann, gan dabht, go nglacann thart ar 10,000 páiste páirt sna Féilte a reáchtáiltear ar fud na tíre gach bliain.
Féile an Iúir 2023
Beidh lúchair mhór ar Ghaeilgeoirí uile na dúiche seo go mbeidh Féile an Iúir ar siúl arís i mbliana den chéad uair le tamall measartha fada. De dheasca na paindéime, cha raibh deis ag scoláirí óga Gaeilge an cheantair páirt a ghlacadh san fhéile dhrámaíochta le traidhfil de bhlianta anuas. Bhal, faigheann foighne fortacht, mar a deir siad. Is i Halla na Cathrach (nó Halla an Bhaile, ag brath ort féin), a bheas an fhéile ar siúl i mbliana. Ba mhinic í i dTeach na hÉigse roimhe seo; láthair níos lú agus níos seascaire, dar leat. Ar an dea-uair, beidh i bhfad Éireann níos mó spáis i láthair na bliana seo – mór an mhaith, nó tá muid ag dúil le scaifte breá i láthair ar an lá. Cúig cinn de scoileanna a bheas páirteach sna bólaí seo, mar atá: Bunscoil an Iúir, Gaelscoil na mBeann, Bunscoil Bheanna Boirche, Bunscoil Naomh Proinsias agus beidh dhá cheann de dhrámaí á léiriú ag Gaelscoil Phádraig i gCrois Mhic Lionnáin. Rachaidh buaiteoirí Fhéile an Iúir ar aghaidh chuig Féile Uladh a bheas ar siúl sa Ghrianán, Leitir Ceanainn ar an 28ú-29ú Márta 2023. Guíonn muid achan ádh ar na rannpháirtithe uile go léir, go n-éirí go geal libh.
