Write a commentTá áthas orainn a fhógairt go bhfuil muid tar éis cuid mhaith sean-chóipeanna den nuachtán “Lá” a fháil ón Bhreatain Bheag. ‘Sé ár gcara Tim Saunders a thiomsaigh iad ó fhoinsí éagsúla sa Bhreatain Bheag. Lena chois fuarthas cóipeanna de na nuachtáin “Inniu” agus “Anois” maraon le heagráin de “An Cosantóir”, “Comhar” agus “Nuacht” (nuachtlitir a foilsíodh í mBéal Feirste sna 1980í). Sa bheart, a tháinig chugainn via leoraí de chuid Pickfords, bhí leabhair áirithe a bhíodh ag Rev. Canon Gwynn ap Gwilym (nach maireann), file agus iar-léachtóir Gaeilge i gColáiste na hOllscoile Corcaigh. Tá muid an-bhuíoch do Tim as an dua a chur air féin dul thart faoi na hionaid difriúla sa Bhreatain Bheag ina raibh na nuachtáin stóráilte.
Tá orainn anois córas slánstórála a chur ar fáil sa Ghaeláras agus tá síntiús eile faighte againn ó Tom Mc Keown (iar-chlódóir ón Iúr) i dtreo na gcostas siúd. Ón bhFómhair ar aghaidh, tá i gceist againn (oibrithe deonacha) an leabharlann a oscailt le linn uaireanta teoranta atá réamh-fhógartha mar táimid den tuairim gur rud riachtanach é ardchaighdeán litearthachta a chothú go speisialta agus Bunscoil an Iúir lonnaithe cóngarach dúinn. Cuirfear tús le sraith imeachtaí sa Ghaeláras go deimhin ar 13 Lúnasa nuair a bhéas an chéad seisiún den bhfiontar nua ‘Cumadóireacht le Chéile’ á reáchtáil againn.
Tuilleadh eolais ó: gaelarasmhicardghail@gmail.com
